COCINCHINA

COCINCHINA

regnum Asiae, in India ulteriori ubi alias Sindi populi iuxta sinum magnum, nunc Cocinchinae sinum. Hunc habet ab Oriente, a Meridie regnum Ciampae, ab Occasu Camboiam et Laos populos; a Septentrione regnum Tunchini. Dividitur in provincias sex; et aliquando Cocinchina cum Tunchino unâ voce, regnum Annanum seu Annamiticum dicitur. Incolis Cachu vel Kachochin vocatur. Sedes regia Kehue, aulâ Principis magnificâ et numerô Nobilium celebris est; commercium hîc ingens, auri, argenti, serici, Sinicorum fictilium seu vasorum porcellaniorum, etc. Alex. Rhodius, Itiner. Mendoza, part. 2. l. 3. etc.